Virgil van Dijk anukia kuondoka Liverpool mwishoni mwa msimu

Hatma ya Van Dijk Liverpool shakani

Mustakabali wa beki kisiki wa Liverpool, Virgil van Dijk, umeanza kuleta hofu miongoni mwa mashabiki wa klabu hiyo ya Anfield. Ripoti mpya zinaeleza kuwa nyota huyo mwenye umri wa miaka 35 anashawishika kuondoka klabuni hapo mwishoni mwa msimu huu, huku mkataba wake ukiwa unaelekea ukingoni.

Van Dijk, ambaye anatajwa kama mmoja wa mabeki bora zaidi kuwahi kutokea katika historia ya Ligi Kuu ya England, bado anaonekana kuwa na makali yake uwanjani. Hata hivyo, hali ya kutokuwa na uhakika kuhusu hatima yake ya kubaki au kuondoka imemfanya kuwa kivutio cha klabu nyingi duniani.

Ofa nono na kishawishi cha kuondoka

Kulingana na uchambuzi wa Mick Brown, aliyewahi kuwa skauti wa Ligi Kuu ya England, kuna sababu mbili kubwa zinazoweza kumfanya Van Dijk kuaga Liverpool: ofa za pesa nyingi kutoka nje ya Ulaya na ukosefu wa mwafaka wa mkataba mpya.

“Kuna fursa nyingi na klabu nyingi zilizo tayari kumchukua Van Dijk kutoka Liverpool. Ikiwa mchezaji wa kiwango chake anapatikana kama mchezaji huru, lazima atakuwa na wachumba wengi,” alisema Brown.

Inadaiwa kuwa vilabu vya Saudi Arabia vinaongoza kwa kumtaka beki huyo, na ni jambo la kawaida kwa wachezaji wengi wa daraja lake kuvutiwa na pesa hizo kuelekea mwishoni mwa nyakati zao za soka nchini Ulaya.

Hofu ya Liverpool bila nahodha wao

Ingawa Liverpool tayari imeanza kujiandaa kwa maisha ya baadaye kwa kusajili mabeki vijana kama Jeremy Jacquet na Giovanni Leoni, wataalamu wanaamini kuwa kuondoka kwa Van Dijk kutaiacha timu hiyo katika hali ngumu.

Brown aliongeza kuwa, pamoja na umri wake kusonga, umuhimu wa Van Dijk katika ulinzi, uongozi, na upangaji wa safu ya ulinzi bado ni mkubwa sana. Kwa sasa, Liverpool wanatarajiwa kukaa meza moja na mchezaji huyo ili kufanya uamuzi kabla ya msimu huu kumalizika.

Klabu inaonekana kuwa na mchezo wa kusubiri ili kuona kama umri hautaanza kumfanya beki huyo kupungua kasi uwanjani, lakini kwa upande mwingine, muda unayoyoma na uamuzi mgumu unakaribia kufikiwa.