Will Lankshear: Je, Tottenham wamefanya kosa kumuuza mrithi wa Harry Kane?

Mustakabali wa Will Lankshear

Uamuzi wa Tottenham Hotspur kumuuza kijana wao, Will Lankshear, kwenda Middlesbrough kwa ada ya pauni milioni 10 umeanza kuleta mjadala mkubwa. Wakati Spurs wakiendelea kutumia pesa nyingi katika dirisha hili la usajili, wataalamu wengi wanaamini kuwa klabu hiyo imepoteza lulu ambayo ingeweza kuwa nyota mkubwa duniani hapo baadaye.

Lankshear, mwenye umri wa miaka 21, ameanza maisha yake pale Middlesbrough kwa kishindo baada ya kufunga mabao matatu katika michezo yake miwili ya kwanza. Hii imeibua maswali mengi kuhusu kama Spurs walipaswa kumwachia staa huyo chipukizi.

Maoni ya kocha kuhusu kipaji cha Lankshear

Scott Chickleday, kocha aliyefanya kazi na Lankshear kwa kipindi cha miaka miwili iliyopita, anaamini mchezaji huyo ana kipaji cha kipekee na ana uwezo wa kufika mbali sana kisoka.

Akizungumza na Sky Sports, Chickleday alisema:

“Wakati mwingine unamaliza mazoezi na kusema, huyu ni mchezaji wa kipekee. Unapata tu ile hali. Ni mtazamo wake. Anataka kuwa namba moja nchini England, na anataka kuwa namba moja duniani pia. Sitashangaa ndani ya miaka miwili akawa mrithi wa Harry Kane.”

Chickleday anaamini kuwa kwa maendeleo yake ya sasa, Lankshear yupo hatua mbili tu kuelekea kuwa mchezaji mwenye thamani ya pauni milioni 100 ikiwa ataendelea kupiga hatua.

Je, Tottenham wana nafasi ya kumrudisha?

Ingawa Tottenham hawakuweka kipengele cha kumununua tena mchezaji huyo (buyback clause) katika mkataba wake na Middlesbrough, klabu hiyo imebakiza haki ya kusawazisha ofa (matching rights). Hii ina maana kwamba kama Middlesbrough watapokea ofa kutoka klabu nyingine kwa ajili ya Lankshear, Tottenham watakuwa na nafasi ya kulinganisha ada hiyo ili kumrejesha kikosini.

Kwa sasa, Lankshear ameamua kuondoka Spurs akitafuta nafasi ya kucheza soka la mara kwa mara katika kikosi cha kwanza, jambo ambalo lilikuwa gumu kwake kupata klabuni hapo kutokana na ushindani mkubwa.

Ikiwa kiwango chake kitaendelea kupanda kama inavyotarajiwa na wadau wa soka, huenda Tottenham wakaishia kutumia kiasi kikubwa cha pesa kumrejesha kijana huyo ambaye tayari anatazamwa kama ‘Harry Kane’ mpya katika soka la England.