Xabi Alonso afanya maamuzi mazito kuhusu mustakabali wa Jamie Gittens na Robert Sanchez Chelsea

Msimamo wa Alonso kwa Jamie Gittens

Kocha wa Chelsea, Xabi Alonso, ameweka wazi mipango yake kuelekea kufungwa kwa dirisha la usajili kwa kutoa uamuzi kuhusu hatima ya mshambuliaji chipukizi, Jamie Gittens. Licha ya kuwepo kwa ofa na nia ya dhati kutoka klabu ya AS Roma ya Italia, Alonso amesisitiza kuwa winga huyo mwenye umri wa miaka 22 bado ni sehemu muhimu ya kikosi chake kwa msimu wa 2026-27.

Gittens, ambaye alijiunga na Chelsea akitokea Borussia Dortmund mwaka 2025 kwa ada ya pauni milioni 48.5, alikuwa na msimu wa kwanza mgumu Stamford Bridge ambapo alihusika kwenye mabao sita pekee katika michezo 27 aliyocheza. Hata hivyo, waandishi wa habari nguli nchini Uingereza akiwemo Jacob Steinberg wamethibitisha kuwa mchezaji huyo haondoki klabuni hapo.

“Jamie Gittens haondoki Chelsea kabla ya dirisha la usajili kufungwa. Roma wameonyesha nia ya kumsajili, lakini yupo kwenye mipango ya Alonso,” Steinberg aliandika kupitia mtandao wa X.

Robert Sanchez kuonyeshwa mlango wa kutokea

Wakati Gittens akipewa nafasi ya kupambania nafasi yake, hali ni tofauti kwa mlinda mlango Robert Sanchez. Ujio wa kipa mahiri kutoka Aston Villa, Emiliano Martinez, umebadilisha upepo kwa Sanchez ambaye ameshauriwa kutafuta changamoto mpya kwingineko.

Taarifa kutoka ndani ya klabu hiyo zinaeleza kuwa Sanchez amepatiwa chaguo la kuondoka kabla ya dirisha kufungwa, vinginevyo atalazimika kubaki kama kipa wa tatu wa timu hiyo. Tayari klabu mbalimbali zimeanza kuwasiliana na uongozi wa Chelsea ili kumnasa kipa huyo baada ya taarifa hizo kuenea.

Ujio wa Emiliano Martinez

Chelsea imekamilisha usajili wa Emiliano Martinez kutoka Aston Villa, hatua ambayo imempa Alonso chaguo imara zaidi langoni. Akizungumza baada ya kukamilisha uhamisho wake, Martinez alionyesha furaha kubwa kujiunga na miamba hiyo ya London.

“Ni furaha kubwa kwangu kuwa katika klabu hii. Kwangu mimi na familia yangu, ilikuwa uamuzi rahisi kufanya. Nataka kufanikiwa hapa, mimi ni mtu anayependa ushindi katika kila kitu ninachokifanya,” Martinez alisema.

Martinez aliongeza kuwa yuko tayari kutoa asilimia 100 ya nguvu zake katika kila mazoezi na kila mchezo ili kuwapa furaha mashabiki wa Chelsea na kuendeleza utamaduni wa klabu hiyo wa kutwaa mataji.