Yan Diomande: Arsenal na Man City zajaribu kumsajili, Real Madrid yagongwa mwamba

Vita ya kumsajili Diomande inazidi kushika kasi

Kiungo mshambuliaji chipukizi mwenye umri wa miaka 19 kutoka klabu ya RB Leipzig, Yan Diomande, ameendelea kuwa gumzo katika dirisha hili la usajili huku klabu kubwa barani Ulaya zikipigana vikumbo kumpata. Licha ya umri wake mdogo, winga huyu wa Ivory Coast anatajwa kuwa mmoja wa wachezaji wanaohitajika zaidi duniani kwa sasa.

Arsenal na Man City walivyofanya ‘calls’

Mtaalamu wa masuala ya usajili, Fabrizio Romano, amethibitisha kuwa klabu za Arsenal na Manchester City zimefanya mawasiliano (calls) katika kipindi cha siku 10 zilizopita ili kujaribu kufahamu uwezekano wa kumsajili nyota huyo. Hata hivyo, inaonekana jitihada hizo hazijazaa matunda kwani mchezaji mwenyewe haonekani kuvutiwa na wazo la kujiunga na timu hizo za Ligi Kuu ya Uingereza (Premier League).

Romano alibainisha kupitia mtandao wa X kuwa: > “Manchester City na Arsenal walifanya mawasiliano kwa ajili ya Yan Diomande katika siku 10 zilizopita lakini mchezaji hafungui milango kwao. Hakuna ofa rasmi kutoka PL na klabu pekee inayojitolea kupambana na PSG ni Real Madrid.”

Real Madrid na ofa iliyokataliwa

Real Madrid imethibitisha kuwa na nia thabiti baada ya kuwasilisha ofa ya Euro milioni 100 kwa ajili ya Diomande, ikijumuisha Euro milioni 90 za uhakika na milioni 10 za nyongeza. Hata hivyo, RB Leipzig wamekataa ofa hiyo wakisisitiza kuwa wanahitaji kiasi cha Euro milioni 130 ili kumwachia staa wao.

Awali, Liverpool walikuwa wakimwania mchezaji huyu kwa ofa ya Euro milioni 100, lakini walijiondoa baada ya Diomande kuonyesha nia ya kujiunga na Paris Saint-Germain (PSG). Hata hivyo, hadi sasa PSG bado hawajafikia makubaliano ya klabu kwa klabu na RB Leipzig, licha ya mchezaji huyo kuwa tayari amekubaliana nao maslahi binafsi ya mkataba wa miaka mitano hadi 2031.

Hatima ya Diomande bado haijajulikana

Mwandishi wa Sky Germany, Florian Plettenberg, amedokeza kuwa hali inaweza kubadilika iwapo Real Madrid wataongeza ofa yao. Ingawa Diomande ameweka wazi chaguo lake la kujiunga na PSG, msimamo wa RB Leipzig ni kwamba hawataachia mchezaji huyo kwa bei ya chini ya matakwa yao.

Kwa sasa, vita hii inabaki kuwa kati ya PSG na Real Madrid, huku klabu kubwa za England zikionekana kusubiri kuona hatima ya mazungumzo hayo.