Yan Diomande aipiga chenga Liverpool, aiweka Real Madrid kwenye kipaumbele

Ndoto ya kujiunga na Bernabeu

Staa kijana wa RB Leipzig, Yan Diomande, amekuwa gumzo kubwa katika dirisha hili la usajili kufuatia kiwango chake bora alichokionyesha msimu uliopita katika Bundesliga na sasa akiendeleza moto wake akiwa na timu ya taifa ya Ivory Coast katika michuano ya Kombe la Dunia 2026.

Ripoti kutoka Hispania kupitia El Debate zinasema kuwa winga huyo mwenye umri wa miaka 19 ameweka wazi msimamo wake wa kutaka kujiunga na Real Madrid pekee. Hii ni habari mbaya kwa klabu za Liverpool na Paris Saint-Germain (PSG) ambazo zimekuwa zikipambana vikali kumnasa fundi huyu.

Liverpool wamepigwa kalenda

Inaripotiwa kuwa Liverpool, chini ya umiliki wa Fenway Sports Group (FSG), walishawasilisha ofa ya kiasi cha Euro milioni 100 kwa ajili ya kumleta winga huyo Anfield ili kuziba pengo lililoachwa na Mohamed Salah, lakini RB Leipzig wameikataa ofa hiyo.

Licha ya Liverpool kupanga kurejea na ofa nyingine iliyoboreshwa, inaonekana juhudi zao zinaweza kugonga mwamba kwa sababu mchezaji mwenyewe amegoma kutinga Uingereza. Taarifa zinaeleza kuwa mchezaji huyo anasubiri ishara kutoka kwa mabingwa hao wa kihistoria wa Ulaya, Real Madrid.

Changamoto kwa Real Madrid

Juni Calafat, mkuu wa skauti wa Real Madrid, amekuwa akimfuatilia kwa karibu Diomande kule kwenye michuano ya Kombe la Dunia. Ingawa mlengwa mkuu wa kocha Jose Mourinho kwa nafasi ya winga wa kulia ni Michael Olise wa Bayern Munich, Diomande ameibuka kama chaguo mbadala muhimu.

Hata hivyo, ili kumpata nyota huyo, Real Madrid watalazimika kutoa kiasi kisichopungua Euro milioni 120 pamoja na bonasi ili kuwashawishi RB Leipzig waachane na mchezaji wao.

Je, ni usajili wa lazima kwa Madrid?

Kuna mjadala mkubwa ikiwa Real Madrid wanapaswa kutumia kiasi kikubwa namna hiyo kwa mchezaji mwenye umri mdogo kama Diomande. Hivi sasa, kikosi cha Mourinho kina watu kama Vinicius Junior na Kylian Mbappe katika safu ya ushambuliaji.

Kwenye winga ya kulia, Madrid wanamkosa Rodrygo ambaye anasumbuliwa na jeraha la muda mrefu la goti, huku wachezaji kama Brahim Diaz, Arda Guler, na hata uwezekano wa kumpanga Bernardo Silva kwenye nafasi hiyo wakipewa nafasi.

Wachambuzi wengi wanaamini kuwa kama Madrid wanahitaji mchezaji wa kutegemewa haraka kwa ajili ya kutwaa mataji makubwa, wanapaswa kumsajili mchezaji aliyethibitisha ubora wake kwa muda mrefu kama Olise, badala ya kutumia kiasi kikubwa cha pesa kwa kijana ambaye amecheza msimu mmoja tu wa kiwango cha juu.