Gabriel Martinelli aondoa hofu Arsenal, Vinicius Junior kipaumbele cha Arteta

Martinelli bado anafurahia maisha Emirates

Wakati kukiwa na taarifa nyingi kuhusu mipango ya Arsenal ya kutaka kumsajili winga matata wa Real Madrid, Vinicius Junior, taarifa njema kwa mashabiki wa ‘The Gunners’ ni kwamba Gabriel Martinelli hana mpango wa kuondoka klabuni hapo.

Ripoti kutoka BBC Sport zimeeleza kuwa mshambuliaji huyo raia wa Brazil anafurahia maisha jijini London na hana nia ya kutafuta changamoto mpya, isipokuwa tu kama atapata ofa ambayo itakuwa sahihi zaidi kwa maendeleo ya soka lake. Kwa sasa, Martinelli ana mkataba unaobakiza miaka miwili, na inaonekana kocha Mikel Arteta bado anamthamini katika mipango yake ya msimu ujao.

Arsenal wanapiga hodi kwa Vinicius Junior

Wakati Martinelli akithibitisha utii wake, uongozi wa Arsenal chini ya kocha Mikel Arteta na mkurugenzi wa michezo, Andrea Berta, wamepania kuleta mapinduzi makubwa. Taarifa zinaeleza kuwa Arsenal wako tayari kufanya usajili wa kihistoria kwa kumshawishi Vinicius Junior kuondoka Santiago Bernabeu na kutua Emirates.

Inadaiwa kuwa Arsenal wamejiandaa kutoa mshahara wa zaidi ya pauni 400,000 kwa wiki, jambo ambalo lingemfanya awe mchezaji anayelipwa pesa nyingi zaidi katika historia ya klabu hiyo. Hata hivyo, Real Madrid inaripotiwa kuhitaji kiasi kisichopungua Euro 160 milioni (pauni 136.6 milioni) ili kumwachia staa huyo, ambaye mkataba wake unatarajiwa kumalizika mwaka 2027.

Je, huu ni mchezo wa mawakala?

Mchambuzi maarufu wa soka nchini Uingereza, Henry Winter, ameonya kuwa uhusiano huu kati ya Arsenal na Vinicius Junior unaweza kuwa ni sehemu ya mbinu za mchezaji huyo kuishinikiza Real Madrid kuboresha mkataba wake.

“Swali kubwa ni kama kweli Real Madrid wanaweza kuruhusu kuondoka kwa nyota kama huyu ambaye ni kivutio kikubwa cha biashara na jezi ulimwenguni? Pamoja na hayo, Arsenal wameonyesha nia ya dhati ya kutaka kuimarisha kikosi chao kwa mchezaji wa daraja la juu kama Vinicius ili kuongeza nguvu katika mashindano ya msimu ujao,” alisema Winter.

Ingawa Arsenal wameshamnasa Christos Tzolis, kocha Arteta anaamini kuwa anahitaji winga mbobezi zaidi upande wa kushoto ili kuleta uwiano na Bukayo Saka aliyepo upande wa kulia. Vinicius Junior, akiwa na kasi, uwezo wa kupita mabeki mmoja-mmoja, na uzoefu wa kushinda mataji ya UEFA Champions League, anaonekana kuwa jibu sahihi kwa mahitaji ya Arsenal kwa sasa.