Gary Neville na Alan Shearer waibuka na mapungufu ya England dhidi ya Panama

England yataabika dhidi ya Panama

Timu ya taifa ya England imejikuta ikipata wakati mgumu katika mchezo wao wa pili wa Kombe la Dunia dhidi ya Panama, hali iliyopelekea wachambuzi mashuhuri nchini humo, Gary Neville na Alan Shearer, kuibuka na ukosoaji mkali dhidi ya kikosi hicho kinachonolewa na kocha Thomas Tuchel.

Baada ya kuanza vyema kwa ushindi wa 4-2 dhidi ya Croatia, matumaini ya mashabiki wa ‘Three Lions’ yalipungua kufuatia sare tasa dhidi ya Ghana, na sasa kiwango cha kipindi cha kwanza dhidi ya Panama kimezidi kuibua hofu juu ya uwezo wa timu hiyo kufika mbali kwenye michuano hii.

Neville ataja mapungufu matatu

Akichambua mchezo huo kupitia ITV Sport, Gary Neville hakuwa na kigugumizi katika kuainisha mapungufu aliyoyaona uwanjani. Alisisitiza kuwa England inashindwa kabisa kutengeneza nafasi za maana dhidi ya timu zinazojilinda kwa nidhamu.

“Tunakosa ustadi, ubunifu na uvumbuzi. Wachezaji wetu wanaocheza pembeni, sehemu ya mwisho ya mchezo wao imekuwa mbaya sana,” alisema Neville.

Neville aliongeza kuwa hali hiyo inafanya timu kuwa kwenye wakati mgumu wa kupenya ngome za wapinzani, na kupendekeza kuwa kocha Tuchel huenda akahitaji kubadilisha mbinu kwa kuingiza washambuliaji wawili ili kuleta tofauti.

Shearer awagusa Rashford na Saka

Kwa upande wake, gwiji wa zamani wa Newcastle United, Alan Shearer, alielekeza cheche zake kwa mastaa Marcus Rashford na Bukayo Saka. Kwa mujibu wa Shearer, wachezaji hao hawajaonyesha kiwango kinachotarajiwa licha ya kupewa nafasi ya kuanza.

“Sijaona takwimu, lakini kwa macho yangu naona Rashford na Saka wamehusika katika mambo mengi ambayo England imefanya, lakini hawajafanya vya kutosha na mipira hiyo,” alisema Shearer.

Shearer alionyesha kukatishwa tamaa na jinsi timu ilivyopoteza kasi baada ya dakika 10 za awali, akitarajia kuwa wangeendeleza mchezo wa kasi ambao hawakuufanya kwa muda mrefu wa kipindi cha kwanza.

Ujumbe wa Anthony Barry

Kocha msaidizi wa England, Anthony Barry, alikiri kuwa vipaji pekee haviwezi kuwapa ushindi katika michuano mikubwa kama hii. Alikiri kuwa timu ilikumbwa na changamoto ya kupoteza mipira mingi iliyowapa Panama mwanya wa kufanya mashambulizi ya kushtukiza.

“Vipaji siyo kila kitu. Tunahitaji mtiririko, maelewano na mipangilio uwanjani. Hatuwezi kutegemea vipaji pekee ili kushinda mechi dhidi ya timu imara kama Panama,” alisema Barry.

England sasa inakabiliwa na kibarua kigumu cha kuhakikisha inarekebisha makosa haya kabla ya mechi zinazofuata, huku presha ikiongezeka kwa Tuchel kutafuta mchanganyiko sahihi wa kikosi chake ili kurejesha matumaini ya mashabiki.