Gary Neville amtaka Thomas Tuchel kufanya mabadiliko mawili kwenye kikosi cha England

Mbinu mpya dhidi ya Panama

Baada ya sare ya bila kufungana dhidi ya Ghana hivi karibuni, kikosi cha England kimekuwa kikichambuliwa kwa kina. Mchambuzi wa soka Gary Neville anaamini kuwa kocha mkuu, Thomas Tuchel, anapaswa kufanya marekebisho ya kimbinu ili kuimarisha safu yake ya ushambuliaji katika mchezo ujao wa mwisho wa Kundi L dhidi ya Panama.

Neville amesisitiza kuwa changamoto ya kukutana na timu zinazocheza kwa kujilinda (low block) ni jambo la kawaida kwa timu kubwa duniani. Akitoa mfano wa Manchester City ya Pep Guardiola, Neville amesema kuwa timu zinahitaji kuwa na ubunifu zaidi na ujasiri wa kupeleka watu wengi katika eneo la hatari ili kufungua ngome za wapinzani.

“Natumai England wamejifunza kutokana na mchezo dhidi ya Ghana. Labda tunahitaji kuongeza krosi nyingi na kupeleka watu wengi zaidi kwenye boksi mapema. Sio lazima tufanye mashambulizi ya ovyo, bali kuwa wabunifu zaidi na kuchukua hatari ndogo ndogo,” alisema Neville.

Suluhisho sio Gordon wala Rashford

Kuna mjadala mkubwa miongoni mwa mashabiki kuhusu nani anayepaswa kucheza upande wa kushoto, huku majina ya Anthony Gordon na Marcus Rashford yakitajwa sana. Hata hivyo, Neville ana maoni tofauti na anadhani kuna wachezaji wengine wanaoweza kuleta tija kubwa zaidi.

Neville amesema kuwa Gordon na Rashford ni wachezaji wazuri na wenye kasi kubwa, jambo ambalo ni muhimu katika mashambulizi ya kushtukiza. Lakini kwa mechi dhidi ya timu inayojilinda kama Panama, anahisi England inahitaji mtu mwenye akili ya mchezo zaidi na uwezo wa kutengeneza nafasi.

“Sioni kama ni hoja ya Gordon au Rashford. Mimi nadhani Morgan Rogers anapaswa kupata nafasi hiyo upande wa kushoto. Ana akili zaidi ya mchezo na anaweza kuunganisha vizuri safu yetu ya ushambuliaji,” aliongeza Neville. Mbali na Rogers, pia amemtaja Eberechi Eze kama chaguo jingine la busara kwa eneo hilo.

Mabadiliko katika safu ya ulinzi

Kando na eneo la ushambuliaji, Neville pia amependekeza mabadiliko katika nafasi ya beki wa kushoto. Ingawa anamkubali Djed Spence kwa bidii yake, anaamini kuwa Nico O’Reilly ndiye anayepaswa kurejea kikosini ili kuleta uwiano bora.

Neville amemalizia kwa kusema kuwa Tuchel hafai kufanya mabadiliko makubwa kupita kiasi (throw the baby out with the bathwater), bali anapaswa kufanya marekebisho madogo ili kuboresha utendaji wa kikosi hicho kuelekea mechi za mtoano.