Lisandro Martinez na Romero wamlipua Gary Neville baada ya kuichapa England

Uwanjani ndipo majibu yalipo

Beki wawili mahiri wa timu ya taifa ya Argentina, Lisandro Martinez na Cristian Romero, wameibuka na kutoa majibu mazito kwa mchambuzi wa soka na gwiji wa Manchester United, Gary Neville. Hii imekuja baada ya Argentina kufanikiwa kuiondoa England katika hatua ya nusu fainali ya Kombe la Dunia kwa ushindi wa 2-1.

Katika mchezo huo uliokuwa na upinzani mkali, England walikuwa wa kwanza kufunga kupitia kwa Anthony Gordon, lakini Argentina walirejea mchezoni na kupata mabao kupitia kwa Enzo Fernandez na Lautaro Martinez, hatua iliyowawezesha kutinga fainali.

Shari ya maneno

Kabla ya mchezo huu, Neville alikuwa ametoa maoni yenye utata kuhusu Martinez na Romero baada ya mchezo dhidi ya Egypt, akiwataja kuwa ni “mabeki wa kati bora zaidi ambao ni wabaya zaidi duniani.” Neville alidai kuwa mabeki hao wanaruhusu mabao mengi ya kizembe lakini wana tabia ya kutokata tamaa.

Kauli hizo hazikupokelewa vizuri na wachezaji hao, ambao wamekuwa wakicheza soka la ushindani nchini England katika klabu zao.

Akizungumza na DSports Argentina, Lisandro Martinez alisema:

“Tumezoea watu kuzungumza kutuhusu kila wakati, inaonekana wanapenda sana kufanya hivyo. Sisi hatujibu kwa maneno, tunaruhusu kiwango chetu uwanjani ndicho kizungumze, na tunafanya hivyo kwa heshima."

"Sitakuwa mjinga kama yeye”

Cristian Romero alikuwa mkali zaidi katika majibu yake, akionesha kutopendezwa na tabia ya wachambuzi kuponda wachezaji bila kuzingatia jitihada zao uwanjani. Romero alifunguka:

“Kitu pekee ninachotarajia ni kwamba nitakapostaafu, sitakuwa mjinga kama huyo. Natumai sitakuwa nikizunguka nikikosoa wachezaji au mtu mwingine yeyote.”

Aliendelea kusisitiza kuwa katika soka, wakati mwingine mambo huenda vizuri na wakati mwingine sivyo, lakini hiyo si mwisho wa dunia. Kwa sasa, yeye na wenzake wanajivunia kuandika historia na taifa lao.

“Tunafanya historia hapa, ni jambo kubwa kwetu. Tunalipenda jezi zetu kuliko mtu mwingine yeyote, na tuna furaha kubwa kuona tunaandika historia hii,” alimalizia Romero.

Argentina kwa sasa inaendelea na mikakati yao ya kutetea taji lao la dunia, huku wachezaji wakionekana kuwa na morali kubwa licha ya presha na ukosoaji kutoka kwa baadhi ya wadau wa soka nje ya uwanja.