Liverpool katika mazungumzo mapya kuinasa saini ya staa wa Morocco, Ayyoub Bouaddi

Liverpool wazidisha kasi kumsaka Bouaddi

Klabu ya Liverpool imeripotiwa kurejea mezani kufanya mazungumzo mapya na mawakala wa kiungo machachari wa Morocco, Ayyoub Bouaddi. Kiungo huyu mwenye umri wa miaka 18, ambaye kwa sasa anang’ara kwenye fainali za Kombe la Dunia 2026, amekuwa gumzo kutokana na kiwango chake bora tangu akiwa na klabu yake ya Lille nchini Ufaransa.

Sio Liverpool pekee inayommezea mate staa huyo kijana. Ripoti zinaeleza kuwa vigogo wengine wa soka barani Ulaya, Arsenal na Real Madrid, nao wameongeza kasi ya kufuatilia hali ya mchezaji huyo. Inasemekana klabu zote mbili zimefanya mawasiliano ya hivi karibuni na kambi ya mchezaji huyo ili kutathmini uwezekano wa kumnasa katika dirisha hili la usajili.

Arsenal wanaongoza mbio?

Licha ya ushindani mkali, vyanzo mbalimbali vinaeleza kuwa Arsenal ndiyo klabu iliyo kwenye nafasi nzuri zaidi ya kumpata Bouaddi. Hii inatokana na ukweli kwamba ‘The Gunners’ wamekuwa wakimfuatilia kijana huyu kwa karibu tangu akiwa na umri wa miaka 16, hatua inayowapa faida ya kujua maendeleo yake kiufundi.

Hata hivyo, kumnasa mchezaji huyu hakutakuwa jambo rahisi wala la bei chee. Inakadiriwa kuwa Lille wanahitaji kiasi kisichopungua pauni milioni 60 ili kumwachia kiungo huyo. Iwapo ada hiyo itafikiwa, Bouaddi atakuwa mchezaji mwenye umri wa miaka 18 ghali zaidi duniani katika historia ya soka.

Maoni ya Paul Parker kuhusu usajili huo

Katika upande mwingine, beki wa zamani wa Manchester United, Paul Parker, ametoa onyo kwa Bouaddi kuhusu kujiunga na Arsenal. Parker anaamini kuwa kuna hatari kwa wachezaji vijana kusajiliwa kwa kufuata ‘wimbi’ la mchezo mmoja au michuano kama Kombe la Dunia.

“Unapaswa kuwa makini kwa sababu mashabiki huwa wanatazama tu Kombe la Dunia au michuano mikubwa, na wachezaji huonekana kama maajabu. Unakumbuka ilivyokuwa kwa Amrabat baada ya Morocco kufika nusu fainali kule Qatar, kila mtu alidhani ni mchezaji mkubwa, lakini alipokuja Manchester United mambo hayakuwa kama ilivyotarajiwa,” alisema Parker.

Parker aliongeza kuwa Bouaddi anahitaji kuendelea kuonyesha utulivu na kiwango cha juu mara kwa mara, kwani soka la klabu katika ligi kama Premier League lina changamoto tofauti na mashindano ya kimataifa.

Kwa sasa, ulimwengu wa soka unaendelea kumtazama Bouaddi katika michuano hii ya Kombe la Dunia, huku klabu kubwa zikiwa tayari kuanza vita ya kuwania saini yake mara baada ya michezo hiyo kumalizika.