Manchester United yajipanga kunasa beki mpya kabla ya dirisha kufungwa

United yatinga sokoni kutafuta beki wa kushoto

Manchester United inaendelea na pilikapilika za kuhakikisha inaimarisha kikosi chake kabla ya kufungwa kwa dirisha la usajili. Taarifa mpya zinaeleza kuwa klabu hiyo imeingia rasmi katika kinyang’anyiro cha kumsajili beki wa Racing Santander, Jorge Salinas.

Hatua hii inakuja wakati ‘Mashetani Wekundu’ hao wakiwa bado wapo katika hatua za mwisho za kukamilisha usajili wa kiungo Carlos Baleba kutoka Brighton. Ingawa Fabrizio Romano amethibitisha kuwa bado hakuna makubaliano ya mwisho kati ya klabu hizo mbili, United wanaonekana kuwa na matumaini makubwa ya kufanikisha dili hilo.

Salinas na Raum kwenye rada

Kwa mujibu wa ripoti kutoka nchini Hispania kupitia Infobae, Manchester United wameingia kwa nguvu katika mazungumzo ya kumsajili Salinas. Inafahamika kuwa Racing Santander wanahitaji klabu yoyote inayomhitaji mchezaji huyo ilipe ada ya kipengele cha kuvunja mkataba wake inayofikia Euro milioni 16, na hawako tayari kushusha bei hiyo.

Kuingia kwa United kumeleta ushindani mkubwa kwa Atlético de Madrid, ambao walikuwa wakimwinda mchezaji huyo kwa muda sasa. Hali hiyo imeilazimu Atlético kuweka muda wa mwisho (deadline) wa wiki hii ili kuhakikisha wanamaliza dili hilo kabla ya United hawajawapiku.

Sambamba na Salinas, mwandishi wa habari za michezo Ben Jacobs amefichua kuwa United pia wamepewa nafasi ya kumsajili beki wa RB Leipzig, David Raum, kama chaguo jingine la kuimarisha safu ya ulinzi ya kushoto.

Changamoto ya Rashford na Carrick

Katika upande mwingine, kurudi kwa Marcus Rashford klabuni baada ya Barcelona kushindwa kutumia fursa ya kumnunua kumeonekana kuleta sintofahamu. Kocha Michael Carrick anatajwa kuwa na mpango wa kumjumuisha tena mshambuliaji huyo kwenye mipango yake, jambo linaloonekana kutowafurahisha baadhi ya mashabiki.

Beki wa zamani wa Manchester City, Nedum Onuoha, ameonya kuwa hali hii inaweza kuwa na athari kubwa kwa kikosi cha Carrick mwanzoni mwa msimu huu.

“Tatizo kubwa bado ni hisia ambazo nimeziona, nahisi Carrick anataka kumjumuisha tena Marcus Rashford. Hili ni jambo ambalo lina mjadala mkubwa sana miongoni mwa mashabiki wa United. Kuna wengine wanakubaliana nalo, lakini wengine wanasisitiza hawataki aendelee kubaki klabuni,” alisema Onuoha.

Carrick sasa ana kazi kubwa ya kusimamia wachezaji, kuunganisha kikosi, na wakati huo huo kutuliza presha kutoka kwa mashabiki kuhusu mustakabali wa Rashford, yote haya yakifanyika huku dirisha la usajili likielekea ukingoni.