Paul Merson: Mwenendo wa Max Dowman Arsenal ndio sababu ya JJ Gabriel kutaka kuondoka Man Utd

Shinikizo la vijana kutaka kucheza soka la ushindani

Staa wa zamani wa Arsenal, Paul Merson, ametoa mtazamo wake kuhusu uamuzi wa kinda JJ Gabriel kutaka kuondoka Manchester United. Mchezaji huyo mwenye umri wa miaka 15, ambaye anatazamwa kama mmoja wa vipaji bora zaidi duniani, amewaambia mabosi wa Old Trafford kuwa hataki kuendelea na mkataba wake.

Merson anaamini kuwa mabadiliko ya soka ya kisasa, ambapo vijana wadogo wanaona wenzao wakipewa nafasi katika timu kubwa, yanaweza kuwa yamechochea uamuzi huo wa Gabriel. Mtaalamu huyo amemtolea mfano Max Dowman wa Arsenal na Rio Ngumoha wa Liverpool kama vielelezo vinavyowafanya vijana wengine kuhisi wanapaswa kupata nafasi mapema.

“Tatizo hapa ni kijana mwenyewe na pengine mawakala wake pamoja na familia. Unapomtazama Max Dowman akipewa nafasi na kufanya vizuri, au Rio Ngumoha kule Liverpool akichezeshwa, Gabriel anaweza kuwa anajiuliza, ‘Mimi pia nastahili kucheza Manchester United sasa hivi’.”

Changamoto ya kizazi kipya

Merson aliongeza kuwa katika zama zake, ilikuwa vigumu sana mchezaji wa miaka 16 kupata nafasi ya kudumu katika kikosi cha kwanza, lakini hali imebadilika. Vijana wa sasa wana vipaji vikubwa na wanatamani kuonyesha uwezo wao haraka iwezekanavyo.

“Hili ndilo tatizo unalokutana nalo na vijana wa sasa; wana vipaji vikubwa kiasi kwamba wanataka kucheza mara moja. Zamani ilikuwa haijawahi kutokea mchezaji wa miaka 16 kuingia moja kwa moja, lakini kwa kuona wenzake wakicheza, anaamini naye anapaswa kuwemo,” aliongeza Merson.

Pigo kubwa kwa Manchester United

Merson anaiona hali hii kama pigo kubwa kwa Manchester United kwani Gabriel anatazamwa kama kipaji cha kipekee ambacho klabu yoyote duniani ingependa kukisajili.

“Ni pigo kubwa sana kwa Manchester United. Niamini, huyu kijana ni kipaji cha ajabu na kila klabu duniani itamtaka. Hakuna klabu ambayo haitahitaji huduma yake,” alisema Merson.

Sifa za Max Dowman

Wakati akizungumzia suala la Gabriel, Merson hakusita kumsifu Max Dowman ambaye hivi karibuni alifunga mabao mawili katika mchezo wa Carabao Cup dhidi ya Ipswich Town.

“Ana uwezo wa kuwapita mabeki kama hawapo, ana cheza kama yuko katika kundi la umri wake. Goli alilofunga, jinsi alivyomdanganya beki na kumwacha chini, ilikuwa kitu cha ajabu kabisa. Arsenal wamefanya kazi nzuri sana kumlea kijana huyu na wanapaswa kujivunia bidhaa hiyo ya akademi yao,” alihitimisha.