Ryan Giggs: Kobbie Mainoo anaweza kuwa Paul Scholes mpya Manchester United

Ujio wa nyota mpya Old Trafford

Gwiji wa klabu ya Manchester United, Ryan Giggs, amemmwagia sifa tele kiungo kijana wa timu hiyo, Kobbie Mainoo, akiamini kuwa ana uwezo mkubwa wa kufikia kiwango cha kiungo mkongwe na legend wa klabu hiyo, Paul Scholes.

Giggs, ambaye alicheza pamoja na Scholes kwa miaka mingi ndani ya United, ametoa maoni hayo kufuatia mchezo wa watani wa jadi dhidi ya Manchester City uliomalizika kwa United kupoteza bao 1-0. Katika mchezo huo, Mainoo alicheza dakika zote 90 na kuonyesha ukomavu mkubwa licha ya matokeo yasiyokuwa rafiki.

Uwezo wa kipekee wa Mainoo

Akizungumza kwenye chaneli ya YouTube ya Rio Ferdinand, Giggs alielezea namna Mainoo anavyotumia akili na kasi yake ya kushtukiza (acceleration) kuwazidi wapinzani wake.

“Sio kasi ya kukimbia umbali mrefu, bali ni ule uwezo wake wa kuongeza kasi ghafla (acceleration). Yeye sio mwepesi sana kwa kukimbia, lakini ana hiyo acceleration, na ana nguvu za mwili. Ni mchezaji mzuri sana,” alisema Giggs.

Kuhusu uwezo wake wa kupiga pasi za mwisho na maamuzi ya kiungo, Giggs anaamini Mainoo bado anajifunza, lakini ana misingi yote inayotakiwa.

“Kama ataongeza ule uwezo wa kupiga pasi za mbali za mita 30 na kupasua safu ya ulinzi, pamoja na kile anachokifanya sasa cha kukokota mpira na kupiga pasi fupi, basi ni nani anayejua (atafikia wapi)? Bado ni kijana na anajifunza kila siku.”

Mabadiliko makubwa chini ya Michael Carrick

Maendeleo ya Mainoo yamekuwa ya kushangaza kwa klabu hiyo. Ripoti za mwandishi mahiri wa masuala ya usajili, Fabrizio Romano, zinaonyesha kuwa uongozi wa Manchester United unafurahishwa sana na namna kijana huyo alivyochipuka chini ya kocha Michael Carrick.

Kimsingi, mambo yamebadilika haraka sana kwa Mainoo. Mwaka huu, kabla ya mabadiliko ya benchi la ufundi, Mainoo alikuwa karibu sana kutolewa kwa mkopo kwenda Napoli. Hata hivyo, baada ya Michael Carrick kupewa jukumu la kuiongoza timu, aliamua kumtumia mchezaji huyo kama nguzo muhimu ya timu.

Leo hii, Mainoo ameshasaini mkataba mpya na anatazamwa kama sehemu muhimu sana ya mradi wa sasa na ujao wa Manchester United. Ni wazi kuwa Carrick ameamini kipaji cha kijana huyo na uamuzi wake umelipa, huku klabu ikimpongeza kocha huyo kwa jinsi alivyomlea na kumtumia Mainoo katika kikosi cha kwanza.