Tottenham yafanya mageuzi makubwa: Wachezaji sita watajwa kuondoka klabuni hapo

Mabadiliko makubwa ndani ya Tottenham

Klabu ya Tottenham Hotspur imekuwa na shughuli pevu katika dirisha hili la usajili, huku kocha Roberto De Zerbi akionekana kuwekeza nguvu kubwa katika kusuka upya kikosi chake. Hadi sasa, klabu hiyo imetumia takriban paundi milioni 230 kusajili nyota kama Sandro Tonali, Matheus Fernandes na Jan Paul van Hecke.

Licha ya kufanya usajili huo mkubwa, Spurs sasa inaangazia zaidi suala la kupunguza idadi ya wachezaji ili kutoa nafasi kwa malengo mengine ya usajili, ikiwemo kusaka mshambuliaji na winga mpya kabla ya dirisha kufungwa.

Romero na Spence waondoka

Mtaalamu wa masuala ya usajili, Fabrizio Romano, amethibitisha kuwa klabu hiyo imefikia makubaliano ya kuwauza nyota wake wawili, beki Cristian Romero na winga Djed Spence.

Djed Spence kwenda Inter Milan, here we go! Makubaliano ya mdomo yameshafikiwa na Tottenham kwa ajili ya beki huyo wa kulia wa England. Ada ya uhamisho ni euro milioni 31.5, alisema Romano.

Masaa machache baadaye, Romano alithibitisha dili la staa wa Argentina, Cristian Romero:

Makubaliano yameshafikiwa kati ya vilabu na Tottenham kwa ofa ya euro milioni 40, pamoja na nyongeza. Atletico Madrid imemaliza dili hilo.

Nani mwingine anayefuata?

Mbali na wawili hao, ripoti zinaeleza kuwa kuna uwezekano wa wachezaji wengine wanne kuondoka klabuni hapo ndani ya wiki chache zijazo. Beki Ashley Phillips anatajwa kuwa njiani kujiunga na Middlesbrough inayoshiriki Championship.

Katika nafasi ya kipa, Guglielmo Vicario anaweza kuondoka kwa mkopo baada ya nafasi yake kuchukuliwa na Antonin Kinksy, ambaye sasa ndiye chaguo la kwanza la kocha De Zerbi.

Vilevile, mustakabali wa viungo Pape Matar Sarr na Lucas Bergvall bado haujajulikana vyema. Pape Matar Sarr anafuatiliwa kwa karibu na vilabu kama Aston Villa na Brentford, huku kocha De Zerbi akiripotiwa kutaka kumbakiza chipukizi Bergvall, licha ya kuwepo kwa ofa kutoka Newcastle, Nottingham Forest na Brighton.

Ni dhahiri kuwa siku za usoni zitakuwa na sura mpya katika viunga vya Tottenham, huku mashabiki wakisubiri kuona ni nani atakayeletwa kuziba nafasi za wanaoondoka.