Thomas Tuchel afunguka kuhusu sakata la kumfokea Djed Spence

Ufafanuzi wa Tuchel kuhusu Djed Spence

Kocha mkuu wa timu ya taifa ya England, Thomas Tuchel, amekanusha vikali madai kwamba anamwandama beki wake, Djed Spence, baada ya kuonekana akimfokea mara kadhaa katika mchezo wa Kombe la Dunia dhidi ya Ghana uliomalizika kwa sare tasa.

Tukio hilo liliibua mjadala miongoni mwa wadau wa soka, hasa baada ya Spence kuonekana akipata maelekezo makali kutoka kwa kocha huyo muda mfupi kabla ya kutolewa uwanjani na nafasi yake kuchukuliwa na Nico O’Reilly katikati ya kipindi cha pili.

Kwanini Tuchel alifoka?

Akijibu malalamiko hayo, Tuchel alieleza kuwa alikuwa akijaribu kumpa maelekezo muhimu beki huyo ili kuongeza kasi ya mashambulizi ya timu. Alisisitiza kuwa hana ugomvi wowote na mchezaji huyo mwenye umri wa miaka 25.

“Nilitaka awe anashiriki zaidi katika awamu ya kushambulia. Nilitaka aanze mashambulizi yetu kwa upana zaidi na afanye mikimbio mingi kupitia mstari wa mwisho. Kwa ujumla, huu ulikuwa mchezo wake wa kwanza kuanza katika mashindano makubwa, hivyo niliweka kila kitu katika muktadha wake. Lazima nifoke kwa sababu hakuna anayeweza kunisikia vinginevyo. Yote ni shwari na Djed,” alisema Tuchel.

Uungwaji mkono kutoka kwa Jack Wilshere

Licha ya sintofahamu hiyo, kocha wa Luton Town, Jack Wilshere, amejitokeza na kumtetea Tuchel. Kwa mujibu wa Wilshere, ni kawaida kwa makocha wakali kudai viwango vya juu kutoka kwa wachezaji fulani ili kuwasaidia kutoipoteza dira mchezoni.

Wilshere aliongeza kuwa, “Nadhani ni kawaida. Niliona kipande cha video kutoka mazoezini alipokuwa akimwambia Djed ‘amka’, na hata Djed mwenyewe alikiri kuwa ni kawaida kwa kocha kama Tuchel kudai vitu vingi. Hiyo ndiyo namna ya kumsaidia mchezaji ili asipoteze umakini uwanjani.”

Kwa sasa, England inaendelea na maandalizi ya michezo ijayo ya Kombe la Dunia huku shinikizo likiwa kubwa kwa kikosi hicho kinachotafuta ubingwa baada ya kuanza mashindano kwa kusuasua dhidi ya Ghana.