Zlatan Ibrahimovic amshambulia Noni Madueke baada ya England kutinga nusu fainali

Zlatan hana mbambamba na kiwango cha Madueke

Gwiji wa soka duniani, Zlatan Ibrahimovic, ametoa maneno mazito kufuatia kiwango duni kilichoonyeshwa na winga wa Arsenal, Noni Madueke, katika mchezo wa robo fainali ya Kombe la Dunia ambapo England iliibuka na ushindi wa 2-1 dhidi ya Norway.

Katika mchezo huo ambao Jude Bellingham alikuwa shujaa kwa kufunga mabao yote mawili, Madueke alipata nafasi ya kuanza kikosi cha kwanza akichukua nafasi ya Bukayo Saka. Hata hivyo, mchezaji huyo hakuonyesha kiwango kilichotarajiwa na alitolewa nje ya uwanja kipindi cha pili baada ya kipindi cha kwanza kisicho na tija.

”England walicheza pungufu”

Zlatan, akizungumza kama mchambuzi, hakuwa na hiyana katika kuonyesha kutoridhishwa kwake na mchango wa Madueke uwanjani, akidai kuwa uwepo wake uliifanya England ionekane kama inacheza pungufu.

“Nafikiri wamekuwa wakicheza na mchezaji mmoja pungufu muda wote ambao Madueke amekuwa uwanjani. Kila anapopata mpira anafanya maamuzi mabaya, na anatembea tu uwanjani,” alisema Zlatan.

Ibrahimovic aliongeza kuwa kama angekuwa kocha Thomas Tuchel, asingesita kumtoa mchezaji huyo mapema kutokana na kushindwa kuingia kwenye mdundo wa mchezo. Zlatan alienda mbali zaidi na kusema kuwa hata nyaya za kamera zilizokuwa uwanjani zilicheza vizuri zaidi kuliko winga huyo.

Ufafanuzi wa Thierry Henry

Katika upande mwingine, mchambuzi Thierry Henry alimtetea kocha Thomas Tuchel kwa maamuzi yake ya kuanza na wachezaji kama Declan Rice, ambaye alionekana kusumbuliwa na matatizo ya kiafya kabla ya kutolewa mapema.

Henry alisisitiza kuwa mabadiliko yoyote yaliyofanywa na Tuchel wakati wa mchezo yalitokana na kutoridhishwa na kiwango cha wachezaji uwanjani, na wala si tatizo la kiufundi pekee. Henry aliwataka wachambuzi wa England kuacha kulalamika kuhusu wachezaji ambao hawakuitwa na badala yake waisifu timu hiyo inayofanya vizuri chini ya kocha huyo.

England sasa inajipanga kwa hatua ya nusu fainali ikiwa na matumaini ya kuendeleza rekodi yao nzuri katika michuano hii ya Kombe la Dunia nchini humo.